التداول الانتقامي

الانتقام من السوق   (Revenge Trading )

التداول الانتقامي هو ان المتداول يدخل صفقات بدافع عاطفي

بعد سلسلة خسائر متتالية بهدف استرجاع الفلوس بسرعة والانتقام من السوق .
قراراتك هنا مش مبنية علي تحليل او خطة بل علي غضب او عاطفة او رغبة في تعويض الخسارة فورا.

طيب ليه ده بيحصلك ؟
1- خسارة نفسية قوية (Loss Aversion)  :
المتداول بطبعه بيكره الخسارة اكتر من حبه للمكسب .
الخسارة بترفع عندك الادرينالين والتوتر وتخليك تدور علي حل سريع .

2- الاحساس بالضعف والتوكيد :
المتداول بيحس الخسارة االكبيرة تحدي لذكائه فبيحاول يتحدي السوق ويكسبه وده مستحيل .

3- سوء ادارة راس المال :
المتداول بعد خسارة صغيرة بيرجع يعوض بحجم صفقات اكبر علي امل التعويض في وقت اقل وده بيورطه في خساير اكبر .

تعرف ازاي انك بتعمل تداول انتقامي ؟
1- تدخل الصفقة بدون خطة واضحة او نقط خروج .
2- رفع حجم المخاطرة برفع حجم الصفقات عن اللي انت متعود عليه او حتي خسرت بيه.
3- تحاول التعويض في نفس اليوم اكتر من مرة .
4- بتاخد قرارات سريعة انت مش حاسبها ومش طبقا لتحليل انت عامله .


عواقب التداول الانتقامي عليك :-
1- استنزاف راس مالك .
2- زيادة التوتر والقلق حتي مستقبليا .
3- فقدان الانظباط والتخطيط .
4- تحطيم الثقة في النفس وبناء عليه ضياع فرص ممكن تكون حقيقة ولكن مشاعر الخوف وانعدام الثقة مسيطرة عليك .

تعالج ده ازاااااااااااااي ؟ تعالي اقولك :-
هتعمل شوية قواعد قبل ما تدخل السوق وهي :-
1- قاعدة حجم مركز محددة : انك مش هتدخل بحجم صفقة يتعدي ال 1 % الي 2 %
2- قاعدة الاستبعاد النفسي : انك محدد لو خسرت X% في اليوم مثلا (5% ) هتوقف تداول باقي اليوم .
3- قاعدة شروط الدخول : اتجاه واضح + دعم او مقاومة + استوب واضح ولو اي شرط من دول اتكسر يبقي متدخلش الصفقة اصلا.

اخيرا لازم تعرف ان السوق مبيوقفش فرص والفرص بتيجي كل يوم والربح اللي مش هيجي النهاردة هيجي بكرا وانك في سوق استثماري يعني لازم يكون عندك خطة للعائد علي راس مالك والعائد ده يكون علي الاقل اسبوعي او افضل شهري وتقوم بمراجعته بعد كل خمس جلسات لكن تكون عارف ان ربح 100 % في يوم هو صدفة مش هتقدر تعملها كل يوم وهتبقي مقابلها في خسارة 100% في يوم تاني انما خطة مدروسة بتتنفذ وتتراجع كل يوم عمرها ما هتخسرك كل يوم .

لان الهدف الرئيسي من التحليل الفني هو وجود نظام
(Make Discipline)