المال لا يختفي من السوق …بل ينتقل   

كل مره السوق يهبط , بنقرا عناوين  زي : “الاسواق خسرت تريليون دولار في يوم واحد” 
اول سوال بيجي في دماغك : راحوا فين؟؟؟ 
هل الفلوس اختفت ؟ اتحركت فين ؟ 
 
في الحقيقه لما بنسمع جمله الاسواق خسرت مليارات , دا بيكون تعبير عن انخفاض القيمه السوقيه للاصول , مش ان مليارات الدولارات خرجت من السوق و اختفت  
مثال : تخيل ان سعر اونصه الدهب كان يتداول عند 3500 دولار , وبعد صدور بيانات اقتصاديه قويه ارتفع الطلب علي الدولار فبدا الدهب يتراجع الي 3400 دولار  
هنا ممكن نقرا عنوان يقول : الدهب فقد مليارات من قيمته السوقيه  
هل دا معناه ان مليارات الدولارات اختفت ؟ 
لا , طب اي اللي حصل  
سعر الدهب بقي اقل من الاول بالتالي قلت القيمه الاجماليه للدهب المسعر في السوق  
لكن مش معناه ان نفس المبلغ خرج من السوق او الاموال اختفت  
ببساطه المستثمرون بقوا يقيموا الدهب بسعر مختلف عن قبل , و مع تغير الاسعار تتغير القيمه السوقيه للاصول  
 

طب الفلوس راحت فين ؟؟

الاجابه بتختلف من حاله للتانيه  
في مستثمر باع قبل الهبوط و حافظ علي ارباحه  
وفي مستثمر اشتري بعد الهبوط لانه شاف ان السعر مغري  
و في صناديق استثمار نقلت جزء من اموالها في الاسهم الي الدهب او السندات او حتي احتفظت بسيوله لحين وضوح الرويه  

 
يعني اللي بيتغير باستمرار مش بس الاسعار …لكن كمان اتجاه السيوله

  
ده بسبب انك احيانا تشوف الاسهم بتتراجع , وفي نفس الوقت الدهب او السندات او الدولار بيحققوا مكاسب , لان جزء من الاموال انتقل من اصل لاخر  
علشان كدا في المره الجايه اللي تقرا فيها عنوان بيقول  
الاسواق خسرت مليارات  
اسال نفسك سوال مختلف : هل الاموال اختفت فعلا ؟ ولا تقييم الاصول انخفض , والسيوله بدات تتحرك في اتجاه جديد ؟ 
لان فهم حركه السيوله بين الاصول , احيانا يكون اهم بكتير من متابعه الرقم المكتوب في العنوان