التعامل مع اسواق المال وقت الاخبار

اهم الاخبار الاقتصادية المؤثرة في اسواق المال :-
خبر الفائدة الامريكية .
خبر معدلات البطالة الامريكية .

خبر معدلات التضخم .

تعالي نعرف انت ليه بتابع الاخبار الاقتصادية :-
(Swing) الاحتمال الاول انك تكون مضارب طويل الاجل هنا انت بتبقي عايز تعرف الاتجاه العام للسوق
وهل هيتغير ولا هيستمر زي ماهو .

(Scalp) الاحتمال الثاني انك تكون داخل تضارب علي الخبر نفسه بشكل لحظي هنا بتبقي محتاج تتوقع بشكل دقيق حركة السوق لحظة الخبر .

طب تعالي اقولك نصايح تعملها واحددهالك علي حدي سواء كنت مضارب طويل الاجل او مضارب لحظي .
نصايحي ليك لو مضارب طويل الاجل :-
فانت لازم تكون ملتزم بمستويات وقف الخسارة اللي انت محددها قبل حدوث االخبر .
تابع الخبر ونسبه وقت صدوره وتابع المؤتمر الصحفي اللي بيتكلم فيه رئيس الفيدرالي ( لو الخبر هو خبر الفائدة ) بس متابعش حركة السوق لحظتها علشان متغيرش قرارتك.

اقرا ما بين السطور وقارن حركة الخبر بحركة السوق الفعلي وهل فعلا الخبر دعم تحرك السوق لاتجاه معين ولا مجرد تذبذب لحظة الخبر .

والافضل لو انت مش متعلق في صفقات قبل الخبر فيفضل تستني لتاني يوم بعد الخبر تكون قريته كويس وشوفت اثره علي الاسواق الثلاثة اسيوي واوربي وامريكي ووقتها تاخد القرار السليم .

طب لو مضارب لحظي تعالي اقولك انت هتعمل اي :-

هتتنقل جزء صغير جدا من حسابك لحساب فرعي تضارب بيه علي الخبر .

  متحاولش تكون اشطر من الحكومة وامشي مع توقعها لو توقعها سلبي او ايجابي .

التزم بالجزء اللي انت بضارب بيه في الخبر ولو خسرته في لحظتها متحاولش تعوض واخرج لتاني يوم من السوق .

نظرا لقوة حركة السوق حاليا لازم تقوم باستخدم حجم صفقة يسمحلك بانعكاس مش اقل من 20 دولار للاونصة او ايا كان الزوج اللي بتتعامل فيه حسب حجم صفقاته لان التذبذب وقت الاخبار بيكون قوي جدا.

اخيرا كشخص هتتعامل مع الاسواق وقت الخبر لازم تكون عارف حجم المخاطرة دي وتكون عارف انها وقت صناعة ثروات وبرضو وقت خسارة ثروات فلازم تكون قد الخسارة وهتتحملها قبل ما تحلم بالمكسب وهتعمل بيه اي في حياتك .

خليك دايما صاحب القرار وعندك خطة واضحة وعارف ان اي تجارة بتحمل المكسب والخسارة وطول ما المكسب مش مبالغ فيه فالخسارة كمان مش هتبقي كسرة ضهر .