التحليل الفني غلط كبير 

كتير مننا بيسال نفسه هو انا علشان اكسب المفروض امشي ورا التحليل الفني ولا التحليل الاساسي ولا التحليل المالي ولا انهي نوع من التحليل ؟
الاجابة كلهم غلط
تخيل ؟
لان ببساطة في الاول لازم تحلل نفسك وتعرف انت داخل السوق ده باي هدف ؟
فنيجي هنا لسؤال انت مين في تعاملك مع الذهب ؟
والاجابة انا مضارب واللي جمبك هيقول وانا مدخر
فتكون برضو الاجابة انه غلط
                                                  نتكلم جد شوية بقي يلا 

وانت داخل السوق وبتتعامل مع الذهب او اي استثمار في حياتك محتاج تعرف هدفك منه وانت داخل الصفقة دي وعايز تكسب كام وعلي مدي زمني قد اي
طب اقولك الاهم
تسال نفسك انت ناوي تقدم للاستثمار ده قد اي من وقتك يوميا وقد اي من جهدك وطاقتك وقد اي من قعدتك من عيالك وقد اي من قعدة قهوتك
ببساطة هتديل الاستثمار ده قد اي من حياتك ؟
وساعتها نشوف هل اللي هتقدمه ده مناسب للي عايز تكسبه ولا اكتر ولا اقل

خلينا نتفق انك الطبيعي تكون واحد من اتنين والتالت غلط عموما وهقولهولك برضو
الاول تكون راجل معاك فلوس وعايز تشيلها لوقت طويل ومش عايز قيمتها تقل مقابل التضخم وغلاء الاسعار فبتشتري من سعر واحد وتفكر في البيع بس وقت الاحتياج او فلوسك بتجيلك اجزاء فهتشتري بيها وليكن كل شهر لما تيجي ايا كان السعر

الثاني انك تكون عايز تعمل دخل اضافي يساعدك في حياتك فانت بالفعل هتبقي في شغلك ولكن عايز كل اسبوع يطلعلك مبلغ كويس يساعدك في مصاريفك فانت هتستني احسن فرص ووالله الفرصة دي جت في اول يوم في الاسبوع او في اخر يوم فانت هتستغلها وتكسب وخلاص لانك مش متفرغ للسوق

ومهم جدا انك لما تقرا النوعين دول هتلاقي انك مقدمتش اي حاجة من حياتك فاكبر غلط بترتكبه انك تبقي عايز تبني ثروة من نص ساعة في يومك

الثالث تكون راجل عايز تبني ثروتك من الذهب والتداول بدون متقدم تضحيات لان دائما علي قد المخاطرة علي قد المكسب
وعايز دايما تعرف السوق رايح فين ونازل ليه وطالع ليه لانك عايز تكسب كل جنيه موجود في السوق وانت غير مؤهل لده

                                              الخلاصة
لو انت راجل عايز تحافظ علي فلوسك او عايز تزود دخلك فانت هتكون مهتم تستخدم التحليل الفني مرة اول الشهر ثم مرة كل اول اسبوع علشان بس تحدد النقط اللي لو جت هتستغلها وخلاص
انما لو اهتميت انك تحلل كل حركة وكل خبر وكل دقيقة الماركت بياخد فيها قرار فببساطة هتكون بتقدم للسوق من حياتك ومجهودك اكتر من اللي انت اصلا محتاجه منه .
وساعتها هترتكب اخطاء تانية هنتكلم عنها في المقالات الجاية باذن الله. 

بقلم حسام محروس